• |
  • 極速報價
  • |
  • 會員
  • 產品服務 / 串流版
  • 設定

29/11/2019

民建聯明年立法會選舉料大失預算

  • 加入最愛專欄
  • 收藏文章
  • 馬天娜

    馬天娜

    畢業後第一份工就係返金鐘,在職場輾輾轉轉,又回到了起點,而金鐘更由當年嘅商業中心,變成為香港權力核心。身為金鐘人,最鍾意就係收盡權力核心外圍同內圍嘅風,識破所有政客嘅語言偽術。

    立會透視鏡

  建制派喺區議會選舉失血過多,後果可以話係一連串,依家除咗連外電都報道西環首領要面臨被撤換(阿爺多個渠道已經否定呢個消息)之外,嚟緊下年立法會選舉,亦都係亂得一團糟,打亂晒「最大黨」民建聯嘅部署。

 

  民建聯今次選舉無咗近100個區議員,地區工作嚴重受創之外,立法會嘅影響都非常大。民建聯有兩席,分別係循區議會(第一)功能界別當選嘅劉國勳同埋俗稱「超區」嘅區議會(第二)嘅周浩鼎,依家兩位現任立法會議員喺區選落馬,如果要保住兩人喺立法會嘅議席,民建聯肯定要大費周章。

 

  先講劉國勳,佢地頭係北區,跟立法會選區就係新界東。新界東一共有9席直選議席,作為「黃營」傳統陣地,2016年選舉建制派喺呢區都算係保守,主力一睇就知係民建聯葛珮帆同陳克勤為主力,另外希望博入新民黨容海欣同埋工聯會鄧家彪,希望坐三望四。當年結果整個建制派得到20萬票,大約係34.6%選票,奪得三席,以11%奪一席計,建制派未有驚喜。

 

  葛珮帆同陳克勤係民建聯嘅新生代主力,畀劉國勳代替兩人其中一人可以話係零可能,要加多張名單出閘,亦好難得過其他建制政黨包括新民黨同工聯會,劉要經直選重回立法會除咗轉區已經無第二條路,但民建聯區區有「大佬」,幾時話轉就轉?似乎2020選舉劉已經無運行。

 

  周浩鼎嘅狀況亦都係非常尷尬。當年佢接受直選洗禮係新界東補選對上楊岳橋,走返去新東同劉國勳一樣已經係無可能;至於佢本身區選所屬東涌,即係新界西,2016年選舉建制派「奇蹟」地以44%選票勇奪5席,比55%嘅泛民仲要多一席,完美示範配票嘅奧義;但上屆泛民同激進派割蓆,再加上朱凱廸大幅吸票倒票落海,先令泛民慘敗,估計再次重演機會好細。

 

  依家阿鼎面對嘅問題有兩個,第一,同黨梁志祥有無機會被勸退由佢頂上;第二,就算佢可以代梁出戰,今次分兩條隊嘅風險有幾大?唔好忘記,呢區有何君堯同麥美娟有能力吸盡未受配票嘅深藍票,亦有田北辰吸唔少淺藍票,明年再分兩條隊,會唔會反而兩船齊沉?

 

 

 《經濟通》所刊的署名及/或不署名文章,相關內容屬作者個人意見,並不代表《經濟通》立場,《經濟通》所扮演的角色是提供一個自由言論平台。

etnet財經?生活App   財智?健康?品味生活     【立即下載】  iOS版 / Android版
我要回應

你可能感興趣

  • 生活副刊
  • DIVA
  • 健康好人生